a[Sai 14:21; Jos 3:14-17]
Psalms 66
Augwaligo te wiegi yai pemene elama, tama Godiba usu da po weyu, balia po wai
1Te tigidali tǫde we bidi,dago wiegi yai pemene elama,
tama bomonama i weyu,
tama Godigo nogi ugwaba sao.
2Te balia po weyu,
te agai genuai nogide po pusao.
Te agai genuai nogi te ugwaba mu sao.
3Dago te tama po Godiba wainao,
“Te nago ebo sę tigidali te wiegi yai mu ebao.
Te nago bomo genuai ugwanu mu igulai elalubao,
tama nago boi bidi dabe te wi mu elama,
tama augwali te nago gesabidiba pibia sagaselama,
te kidu sugunagasobo dao.”
Te tobage po wainao.
4Te tǫde we bidi tigidaligo nageba lotu waibao.
Augwa te balia po weyu, nago nogi ugwaba sabo dao.
5Dage aselama, te Godigo yali sę suiąo.
Te genuai genuai sę dabe agai
te we bidi dabe tomode yai dao.
6Agai te tamu ąįgo pesage
te wa pai pedalumainu ilama,
tama dago wąį nǫų dabe tedu pelayu,
tama te wę nogegi pai.
Tede te augwaligo Godiba wiegi yai
homu pemene yai dao. a
7Agai te genuai bomo elalu, tama aga te king sesemane
bidada peyu, bidada pobao.
Tama agai te we bidi hani tigidaligo
ebo sę tigidali te bugagia subao.
Tama tiyu, te meba hanigo te Godide hagoma yabuo.
8Dage tigidali hani, dagego
te dena God nogi ugwaba siąo.
Dagego te God nogi ugwaba sabo,
tama te we bidi dabego odaibao.
9Agai da tonalubaso,
tama da te bidibo ula dali bidibao,
tama agai da te dwai sęgęba
tulalumainu me sula tagalubeo.
10God, nago da usu siyu, te bidi dabego
te wiegi yai kapa silva te siago ulama,
tama te hogomu kakali sela sąbo tiwai ebo dao.
11Nago da te bono gągągo tola selama,
tama nago genuai sęgę daba muani.
12Nago te boi bidi dabego da mu agala somainu ilali.
Tama da te sia dobadi te sia dabo
tomodu bilali tiwai eyu,
tama te asobo wę tomodu pabo yali.
Tiali goli, megi nago da te wiegi yai
pesageba odasa aselama, bidibao.
13Polobadu te sęgę enaba pedalubaso,
tama eno nageba po dąų weyu,
te siaba tigidali ulama, domainu ebo ofa
mawaiba po wai.
Eno te dąų walali po me konealuyu,
tama tialima, eno te ofa dabe nageba selasa asaibao.
Te eno nago tempel beba te hasa dabe sela aselama,
te siaba ulumainu yaibao.
15Te eno te nisali kibu hasa dabe te altade ulama,
tama eno nageba te ofa mawaibao.
Awe, eno te omai sipsip dabe ulama,
tama nago te ofago te denami ebo
te wiegi yai odaibao.
Tama eno te omai bulmakaugo,
me te omai memego te ofa yaibao.
16Dage te God dologode bidibo
we bidi dabe, dage aselama, te eno po odagasiąo.
Te eno dagebolo te tigidali sę po
te Godigo ena tau selama, yali sę po waibao.
17Polobadu te eno agaba i weyu,
te ena tau sao olama,
tama eno aga nogi ugwaba sabo
balia po wainu sisi ilali.
18Tiali goli, eno homugo te eno dwai
sę ebo kolesaga te olo nai tiwai da
wagi sogo da, teda Genuai Bidigo
te eno gedu haluasa po wabo
te me odogi menigi dao.
19Tiali goli, Godigo eno wabo po odalio.
Mu tama, agai eno gedu haluasa po wali odai dao.
20Eno God nogi ugwaba sobao.
Magi baso meni, agai eno gedu haluasa po
te tudiba me musiąwai,
tama agai te enade godolo mu
sesemane ebo te me dagala sabeo.
Copyright information for
MPS